छक्कापञ्जा ४’ पछि निर्माता तथा अभिनेता दीपकराज गिरी नयाँ फिल्मको तयारीमा छन् । केही फिल्मको ‘लाइनअप’का लागि काम भइरहेको छ । तर भदौदेखि मल्टिप्लेक्स हल सञ्चालन गर्नुपर्ने र त्यसपछि चाडपर्वको सिजन आउने भएकाले दीपकलाई नयाँ फिल्मको छायांकन गर्न सकस छ ।
यसैबीच, उनको होम प्रोडक्सन कम्पनी आमा सरस्वती मुभिजबाट बन्ने आगामी फिल्मको छायांकन मंसिर १ गतेदेखि थाल्ने तयारी छ । जुन फिल्मलाई दीपाश्री निरौलाले गर्ने निश्चित भएको छ |
अनलाइनखबरसँग कुरा गर्दै दीपकले यसको पुष्टि गरे । यो फिल्मलाई मंसिरमा छायांकन गरेर नयाँ वर्षको छेकोमा प्रदर्शन गर्ने तयारी छ । ‘होम प्रोडक्सनको फिल्म बनाउने तय भयो । यो फिल्मलाई दीपाजीले निर्देशन गर्नुहुनेछ,’ दीपकले भने, ‘चैत वा वैशाख वरपर फिल्म रिलिजको तयारी छ ।’
दीपक आगामी फिल्मलाई आफूहरुकै अघिल्लो फिल्म ‘वडा नम्बर ६’ को शैलीमा बनाउन चाहन्छन् । सामाजिक र कमेडी कथावस्तुमा बनाउने फिल्मको स्क्रिप्ट लेखन भइरहेको छ । ‘अब आउने फिल्मको शैली वडा नम्बर ६ जस्तै हुन्छ,’ उनले फिल्मको प्रारुपबारे भने, ‘दर्शकले हामीसँग कमेडीको पनि अपेक्षा गर्नुहुन्छ । सोहीअनुसार पेश हुन्छ ।’
यो फिल्मपछि दीपकको कम्पनीले केदारप्रसाद घिमिरे ‘माग्ने बुढा’, सरोज न्यौपाने लगायतसँग मिलेर फिल्म निर्माणको योजना बनाइरहेको छ ।
