सप्तरीको राजविराजको मुख्य सडक अन्तर्गत नेता चोकदेखि दक्षिणमा एक बिरामीलाई बीच सडकमै राखेर उपचार खर्च जुटाउन थालिएको छ । दाङको तुलसीपुर घर भएका राजकुमार विकलाई उपचार खर्च जुटाउन स्थानीय अभियन्ताले उनलाई सडकमै राखेर उपचार खर्च जुटाउन थालेका हुन् ।
खुट्टामा धेरै दिनदेखिको चोट पाकेको अवस्थामा रहेका उनी स्वास्थ्य समस्याबाट समेत पीडित रहेको उनका भाइ गणेश विकले बताए । ‘कामको सिलसिलामा दुई महिनाअघि यहाँ आउनु भएको थियो, भाइ गणेशले भने, ‘हिजो उहाँ बिरामी परेको खबर आएकोले लिन आएको हुँ ।’
अस्पताल लैजान आफूहरूसँग पैसा नभएको भन्दै उनले बिहान स्थानीय अभियन्ताहरूलाई खबर गरेका थिए । भाइले घर लैजान समेत भाडा नभएको बताएपछि आफूहरूले सहयोग जुटाउन सडकमा राख्नुपरेको अभियन्ताहरूले बताएका छन् ।
दुई महिनाअघिदेखि कामको सिलसिलामा राजविराज आएको भाइ गणेशले बताए । केही पैसा जम्मा भए घर लगेरै उपचार थाल्ने उनले बताए । ‘यहाँ हल्का उपचार गरेर बरु घर लैजान पाए । ऋणपान गरेर घरतिरै उपचार गर्नुहुन्थ्यो ।एम्बुलेन्समा लैजान पनि पैसा छैन,’ उनले भने । सोमबार उपचारका लागि अस्पताल लगेपनि पैसा नभएका कारण दाइलाई त्यत्तिकै फर्काउनुपरेको उनले बताए ।
