नेकपा (एकीकृत समाजवादी) का सांसद प्रकाश ज्वालाले सभामुख पदका लागि ईश्वरीदेवी न्यौपाने योग्य पात्र भएको बताएका छन् । बिहीबार प्रतिनिधिसभाको बैठकमा न्यौपानेको पक्षमा पार्टी रहने भन्दै समर्थनमा उनले न्यौपानेलाई सबै दलहरूले मत दिएर जिताउनुपर्ने बताएका हुन् ।
`हामीले ईश्वरीदेवी न्यौपानेलाई समर्थन गर्दैछौं । अहिले सभामुख पदको निर्वाचन हुँदैछ । यो सभाले आफ्नो नेता चयन गर्दा दलीय आग्रहभन्दा माथि उठेर योग्य र सक्षम व्यक्ति चयन गर्नुपर्छ । यो सदनको साँच्चिकै नेतृत्व गर्ने व्यक्ति चयन गर्नुहुने छ भन्ने विश्वास छ’ ज्वालाले भने, ‘यहाँ राष्ट्रिय सहमतिको चर्चा चलिरहेको छ । प्रधानमन्त्री ज्यूलाई यस संसदका दुईजना बाहेक सबैले मत दिनुभएको छ । यो देशका विभिन्न संकट समाधानका निम्ति सभामुखमा एकतावद्ध भएर जान सक्दैनौं ? त्यो सन्देश फेरि दिने यो सदनलाई अवसर छ ।’
