बाँकेमा मोटरसाइकलको ठक्करबाट एक जना प्रहरीको मृत्यु भएको छ । मृत्यु हुनेमा जिल्लाको नेपालगञ्ज उपमहानगरपालिका स्थित अस्थायी प्रहरी पोष्ट राँझा बिटमा कार्यरत प्रहरी हवल्दार भूपेन्द्रबहादुर शाही रहेका छन् ।

ट्राफिक जाँचमा खटिएका प्रहरी हवल्दार सहित प्रहरी जवान नरेशकुमार चौधरीलाई नेपालगञ्जबाट कोहलपुरतर्फ जाँदै गरेको भे १०प ४७५७ नंको मोटरसाइकलले गएराति नेपालगञ्ज उपमहानगरपालिका–२० राँझा चोकमा ठक्कर दिएको थियो ।

मोटरसाइकलको ठक्करबाट गम्भीर घाइते भएका शाहीको शिक्षण अस्पताल नेपालगञ्जमा उपचारका क्रममा ज्यान गएको हो ।

प्रहरिका अनुसार, बाँसगढी नगरपालिका–६ बर्दियाका शाहीको उपचारको क्रममा गएराति ज्यान गएकाे थियो । प्रहरी जवान चौधरी र मोटरसाइकल चालकको अवस्था सामान्य रहेको छ । मोटरसाइकल चालक गेरुवा गाउँपालिका बर्दियाका २४ वर्षीय सन्तोष बम ठकुरीलाई जिल्ला प्रहरी कार्यालयमा बुझाइएको प्रहरीले जनाएको छ ।