रुकुम पूर्वमा टिपर दुर्घटनामा परि दुईजनाको मजदुरको ज्यान गएको छ भने अन्य दुई जना घाइते भएका छन् ।
जिल्लाको भूमे गाउँपालिकाको-५ को झिङ्गेटारमा बा २ क ७०१८ नम्बरको टिपर ढुंगा झार्ने क्रममा पल्टिंदा गम्भिर घाइते भएका रुकुम(पूर्व) पुथाउत्तरगंगा गाउँपालिका-१४ का करिब २५ वर्षका गोविन्द बुढा र भूमे गाउँपालिका ५ उपल्लो साकिमका २५ वर्षका दामु बुढाको रुकुम (पूर्व) अस्पतालमा उपचारको क्रममा ज्यान गएको हो ।
घाइते ३५ वर्षीयका ध्रुव घिमिरे र उदयपुर चौबन्दिगढी नगरपालिका-५ का २३ वर्षीय रामआशिस चौधरीको रुकुम (पूर्व) अस्पतालमा उपचार भइरहेको छ ।
टिपर चालक दोलखाका ३२ वर्षका सन्तोष माझीलाई नियन्त्रणमा लिएर थप अनुसन्धान थालिएको प्रहरीले जनाएको छ ।
