इन्डियन प्रिमियर लिग (आईपीएल) को १५औं संस्करणमा नेपालबाट सन्दीप लामिछानेको मात्र अक्सन हुने भएको छ ।
नेपालबाट अक्सनका लागि लामिछानेसहित करण केसी, विनोद भण्डारी, शरद भेषावकर, सोमपाल कामीलगायत १५ खेलाडीले नाम दर्ता गराएका थिए ।
भारतीय क्रिकेट नियन्त्रण बोर्ड(बीसीसीआई)ले मंगलबार सार्वजनिक गरेको अक्सनमा परेका खेलाडीको सूचीमा नेपालबाट राष्ट्रिय टिमका कप्तानसमेत रहेका लामिछाने मात्र परेका हुन् ।
सन्दीपले यसअघि दिल्ली क्यापिटल्सबाट आईपीएल खेलेका थिए । दिल्लीले गत सिजन अघि सन्दीपलाई रिलिज गरेको थियो, तर गत सिजन अक्सनमा सन्दीपलाई कुनै टिमले पनि अनुबन्ध गरेन । यस पटक आईपीएलमा नयाँ दुई टिम थपिएका छन् ।
