भेटमा प्रधानमन्त्रीसमेत रहेका सभापति देउवालाई भेटेर पार्टी निर्वाचनलाई धाँधलीरहित र निष्पक्ष बनाउन आग्रह गरेको पाैडेलले बताएका छन्।
प्रधानमन्त्रीको सरकारी निवास बालुवाटारमा भएको छलफलमा पौडेलसँगै महामन्त्री डा. शशांक कोइराला, नेताहरु प्रकाशमान सिंह, अर्जुननरसिंह केसी, डा. मीनेन्द्र रिजाल र जीवन परियारलगायत सहभागी थिए।
छलफलमा पार्टीका क्रियाशील सदस्यहरुको छानबिन निष्पक्ष र पारदर्शी ढंगले सम्पन्न गर्न र पार्टीको महाधिवेशनमा राज्यको प्रहरी/प्रशासनको दुरुप्रयोग हुन नपाओस् भनेर ध्यानाकर्षण गराइएको वरिष्ठ नेता पौडेलले जानकारी दिएका छन्।
कांग्रेसको डडेल्धुरा जिल्ला कार्यसमितिले क्रियाशील सदस्यतामा देखिएको विवाद समाधान गरेर मात्रै वडा अधिवेशन गर्न सभापति देउवालाई आग्रह गरे पनि केन्द्रीय निर्वाचन समितिबाट खटिएका प्रतिनिधिले अधिवेशन सुरु गराएका हुन्।
जिल्ला कार्यसमितिले क्रियााशील सदस्यता नवीकरण र नयाँ क्रियाशील सदस्यताका लागि केन्द्रमा सिफारिस गरिएकामध्ये ४ सय ६० जनाको नाम हटाइएको र सिफारिस नै नगरिएका ३ सय १२ जनाको नाम केन्द्रबाट थपिएको भन्दै आपत्ति जनाएको छ।
उपसभापति विमलेन्द्र निधिले पनि सभापति देउवालाई पत्र पठाएर डडेल्धुराको विवाद समाधानका लागि आग्रह गरेका थिए।
यस्तै वरिष्ठ नेता रामचन्द्र पौडेल, महामन्त्री डा। शशांक कोइरालाले पनि बिहीबार भेटेरै डडेल्धुरामा विवाद समाधान गरेर मात्रै अधिवेशन गर्न आग्रह गरेका थिए।
जवाफमा सभापति देउवाले वडा अधिवेशन सार्न निर्देशन दिइसकेको जवाफ दिएका थिए। तर, निर्वाचन अधिकृत लोकेन्द्रबहादुर बमले विज्ञप्ति जारी गरेर वडा अधिवेशन नरोकिने जनाएका थिए।
