विराटनगर महानगरपालिकाले online कक्षामार्फत अध्यापन गराउने निजी स्कुलहरुले विद्यार्थीका अभिभावकबाट आधा मात्र शुल्क लिन निर्देशन दिएको छ ।
विद्यार्थीका अभिभावकहरु निजी स्कुलले मनपरी शुल्क मागेको भन्दै गुनासो गरेपछि शुल्क निर्धारण गरिएको महानगरपालिकाको शिक्षा विभाग प्रमुख दुर्गाप्रसाद खतिवडाले बताए ।
महानगरपालिकाले कोभिड–१९ का कारण बन्द रहेको तर अनलाइन कक्षा सञ्चालन गरेका विद्यालयलाई विद्यार्थीका अभिभावकबाट समान्य अवस्थामा तोकिएको शुल्कको ५० प्रतिशत मात्रै लिन भनेको हो ।
विद्यालयले online शुल्क कति लिने भन्ने कानूनी व्यवस्था नभएको र कोरोना महामारीमा अभिभावकहरुले पुरै शुल्क तिर्न नसक्ने भन्दै गुणासो गरेपछि शुल्क निर्धारण गरिएको उनले बताए ।
उनका अनुसार अभिभावकलाई राजी गराउन सक्ने निजी स्कुलहरुले भने पुरै शुल्क लिन पाउँने छन् । तर अभिभावकको सहमति विना आफुखुशी शुल्क लिने र विद्यार्थीलाई पुरै शुल्क लिन दवाब दिने विद्यालयहरुले भने आधा मात्र शुल्क लिनुपर्ने उनको भनाइ छ ।
महानगरको निर्देशन विपरीत कार्य गरेको पाइएमा कानूनी कारबाही गरिने समेत महानगरले जनाएको छ ।
