म्यादी हुँ भन्दै म्यादी प्रहरीको पोशाकमा उत्तेजक भिडियो बनाइ सामाजिक संजालमा पोष्ट गर्ने एक युवक पक्राउ परेका छन् । पक्राउ पर्नेमा कपिलवस्तु जिल्लाको बाणगंगा नगरपालिका– ४ का १६ वर्षीय नवराज रेग्मी रहेका छन् ।

उनलाई जिल्ला प्रहरी कार्यालय कपिलवस्तुबाट खटिएको टोलीले मंगलबार नै पक्राउ गरेको हो ।

उनले म्यादी प्रहरीको पोशाकमा उत्तेजक भिडियो बनाएर सामाजिक संजालमा सार्वजनिक गरेका थिए । उनले भिडियोमा भनेका थिए, ‘सागर, वसन्ते, किस्ने सबहरू नडरा न हो । तेरो दाइ मिदी भइसकेको छ । केटाहरू के खाना मन छ बाटोमै खा न हो बाल भएन, जोइन तान्न मन छ भने पनि तान्दे । लड्न मन लागे लड । कसैलाई हान्न मन छ भने हान्दे, तेरो दाइ छ मिदी ।

माँ कसम निखिल उप्रेती मेरो नाम नेपालभरि चिन्छ । इन्स्पेक्टर त डराउँछ । नेपालको कानुन डराउँछन् ।’

प्रहरीका अनुसार रेग्मीले आफ्ना फुपूका छोरा पुरण भट्टराईको म्यादी प्रहरीको पोशाक लगाएर भिडियो बनाएको खुलेको छ । रेम्मी म्यादी प्रहरी नभए पनि पुरण घरमा नभएको बेला उनले पोशाक लगाएको खुलेको छ ।