गायक दुर्गेश थापाको नयाँ ‘पैसा’विवादित भए संगै तत्काल रोक्न माग गरिएको छ । उनको आफ्नै शब्द, संगीत, स्वर र अभिनयमा रहेको उक्त गीत गत शुक्रबार सार्वजनिक भएको थियो । गीत सार्वजनिक भएपछि आपत्तिजनक शब्द र प्रस्तुतिका कारण गीत विवादित बनेको हो ।
र्याप शैलीको यस गीतमा दुर्गेशले ‘छाडा’ र आपत्तिजनक शब्दहरु प्रयोग गरेको भन्दै वैज्ञानिक समाजवादी महिला संगठन केन्द्रीय कमिटीले गीतको प्रसारण तत्काल बन्द गर्न सम्बन्धित संस्था र राज्यका निकायलाई आग्रह गरेको छ ।
संगठनले प्रेस विज्ञप्ति जारी गर्दै ‘गीतमा सभ्य समाजमा पाच्य नहुने खालका शब्दहरुको अत्याधिक प्रयोग भएको छ । त्यसैगरी महिलाको अर्धनग्न शरीरलाई पैसासँग जोडेर अश्लील तरिकाले प्रदर्शन गरेर महिलालाई वस्तुकरण गरिएको छ’ संगठनको केन्द्रीय कमिटी संयोजक धनकुमारी सुनारद्वारा जारी विज्ञप्तिमा भनिएको छ । आग्रहलाई बेवास्ता गरे यस प्रकारका गीत र कलाकारहरु विरुद्ध आन्दोलन गर्ने चेतावनी समेत संगठनले दिएको छ ।
