नेकपा एमाले सचेतक महेश बर्तौलाले राजनीतिक सहमतिप्रति सरकारबाट ठूलो धोका भएको आरोप लगाएका छन्।
उनले सुन तस्करी सम्बन्धमा अनुसन्धान गर्न ५ असोजमा उच्चस्तरीय जाँचबुझ आयोग निर्माण गरी कार्य प्रारम्भ गर्ने सरकार र दलहरूबीच सहमतिअनुसार कार्यान्वयन गर्न सरकार तयार नभएको बताएका हुन्।
आइतबार सामाजिक सञ्जालमा लेख्दै सचेतक बर्तौलाले पूर्वसहमतिबमोजिम अगाडि बढ्न र कार्यान्वयन गर्न अहिले सरकार तयार नभएको बताएका हुन्।
उनले सहमति कार्यान्वयन नहुनुले यसले सुनलगायतको तस्करी र गैरकानुनी धन्दामा उच्चस्तरीय सरकारी संलग्नताप्रतिको आशंका झनै बढेर गएको बताए।
‘आफैँले गरेको सहमतिलाई समेत लत्याएर राजनीति र संसद्लाई घात–प्रतिघात, धोकाधडी, अविश्वास र द्वन्द्वतर्फ धकेल्न सरकार प्रयत्नशील रहेको हो कि भन्ने आशंकाप्रति यस घटनाले सत्य प्रमाणित गरेको छ,’ उनले भनेका छन्, ‘यो देशका लागि असाध्यै दुःखद र गम्भीर चिन्ताको विषय हो। यद्यपि, संवाद र छलफलको प्रयत्नलाई भने सकारात्मक रूपमै लिएका छौँ।’
