धनुषामा एक प्रहरी जवानमाथि किशोरीलाई यौन दुर्व्यवहार गरेको आरोप लागेको छ । प्रहरी चौकी लालगढका प्रहरी जवान रुपेश चौधरीले स्थानीय १४ वर्षीय किशोरीमाथि यौन दुर्व्यवहारको आरोप लागेको हो ।

मंगलबार राति करिब १० बजेको समयमा प्रहरी जवान चौधरीले ती किशोरीलाई यौन दुर्व्यवहार गरेको आरोप छ । उनलाई अहिले पक्राउ गरी हिरासतमा राखिएको जिल्ला प्रहरी कार्यालय धनुषाका डीएसपी वेदप्रसाद गौतमले जानकारी दिए ।‘

बालिका मामाको घरमा पूजामा गएको थिइन्,’ डीएसपी गौतमले भने,‘दुईजना प्रहरी पनि त्यहाँ प्रसाद खान गएका रहेछन् । सोही क्रममा प्रहरी जवान चौधरीले अन्जानमा किशोरीको जिउमा छोइएको बताएका छन् । तर, पीडित पक्षले दुर्व्यवहार नै गरेको आरोप लगाएका छन् ।’

यस विषयमा अनुसन्धान भइरहेको उनले बताए ।

यसअघि प्रहरीले घटना लुकाउन खोजेको भन्दै स्थानीयहरुले प्रहरीविरुद्ध पूर्व-पश्चिम राजमार्गमा अवरुद्ध गर्दे गरेका थिए ।