नेपाली कांग्रेसकी केन्द्रीय सदस्य अञ्जनी श्रेष्ठले पार्टीमा खल्तीका मान्छेलाई अवसर दिलाउने प्रतिस्पर्धा रहेको भन्दै त्यसरी संगठन नबन्ने बताएकी छन् । केन्द्रीय कार्यसमितिको शुक्रबारको बैठकमा नेता श्रेष्ठले पार्टीमा युवा नेताहरू पदाधिकारी बनेपछि पार्टीको कार्यशैलीमा सुधार नआएको भन्दै गुनासो गरिन् ।
पार्टीमा योङ महामन्त्रीहरू आउनुभएको छ, केन्द्रीय सदस्यहरू पनि योङ–योङ हुनुहुन्छ । तर पार्टीको अवस्था उही छ, उस्तै कार्यशैली छ,’ उनले भनिन्, ‘अहिले पार्टीको संगठन यस्तो भएको छ कि अवसर दिने, नियुक्ति दिने, मनोनयन गर्ने काम भइरहेकै छ । तर, कोही कसको खल्तीका, कोही कसको खल्तीका, कोही मन्त्रीका, यसरी सबै खल्तीका मान्छेमात्रै राखेर भ्रातृ संस्था कसरी चल्छन् ? पार्टीको संगठन कसरी बन्छ ?’
उनले महामन्त्रीहरूले बैठकमा ल्याएको प्रस्तावले पार्टीमा आशा जगाएको भन्दै त्यसलाई थपघट गरेर यथाशीघ्र कार्यान्वयनमा लैजानुपर्ने बताइन् ।
केन्द्रीय सदस्य श्रेष्ठले चुनावमा पार्टीले गठबन्धन गर्दा चितवनलाई अन्याय भएको गुनासो गरिन् । ‘एउटा चुनावमा गठबन्धन हुन्छ, एउटा विषयमा साझेदारी हुन्छ । तर भएजति सबै चुनावमा गठबन्धन गर्ने त कसरी मिल्छ ? नभए पार्टी अलग–अलग हुनुको के अर्थ ? त्यसमाथि चितवनमा त कांग्रेसले जतिपटक चुनाव आउँछ, सबैमा पद गुमाउनुपर्छ,’ उनले भनिन्, ‘सभापतिज्यू, अनि हामी कांग्रेसमा किन लाग्ने ? सबै पद जति अरुलाई छोड्नका लागि चितवनका बासिन्दाले कांग्रेसमा किन लाग्ने ?’
