विश्वभर कोरोना भाइरसको संक्रमणपछि मृत्यु हुनेको संख्या ४४ लाख नाघेको छ ।
पछिल्लो २४ घण्टामा १० हजार २१२ जनाको मृत्यु भएसँगै विश्वभर संक्रमणबाट ज्यान गुमाउनेको संख्या ४४ लाख ३ हजार ९२२ पुगेको छ ।
खोपको विकासपछि विश्वभर जारी खोप अभियानले महामारी नियन्त्रण र मृत्युदरमा केही कमी ल्याए पनि खोपको समान वितरण हुँन नसक्दा अझै महामारी नियन्त्रणमा आउन सकेको छैन ।
बहुसंख्यक नागरिकलाई खोप लगाइएपछि विश्वको सबैभन्दा प्रभावित संयुक्त राज्य अमेरिकामा संक्रमण लगभग नियन्त्रणमा आइसकेकोमा फेरि महामारी बढ्न थालेको छ ।
पछिल्लो २४ घण्टामा त्यहाँ १ लाख ५१ हजार ३२५ जनानमा संक्रमण भएको छ । यस्तै थप १०२० जनाको मृत्यु भएको छ । योसँगै अमेरिकामा ६ लाख ४१ हजार ३११ जनाको मृत्यु भइसकेको छ ।
यसैगरी ब्राजिलमा ५ लाख ७१ हजार ६६२ जनाको मृत्यु भएको छ । दोस्रो लहरले अति प्रभावित मुलुक भारतमा भने संक्रमण घटेको छ । दैनिक ४ लाखसम्म संक्रमण देखिएको भारतमा अहिले दैनिक औषत ३५ हजार संक्रमित देखिन थालेका छन् । तथापि त्यहाँ तेस्रो लहरको खतरा उच्च भएको विज्ञहरूले चेतावनी दिएका छन् । भारतमा बिहीबार बिहानसम्म ४ लाख ३३ हजार ६३ संक्रमितको मृत्यु भएको छ ।
यस्तै रूसमा १ लाख ७२ हजार ९०९ जना, बेलायतमा १ लाख ३१ हजार २६० जना, फ्रान्समा १ लाख १२ हजार ९७६ जना, इटालीमा १ लाख २८ हजार ५७९ जनाको मृत्यु भएको छ ।
विश्वभर पछिल्लो २४ घण्टामा ६ लाख ७९ हजार ३४७ जना संक्रमित भएका छन् । यही अविधमा संक्रमणमुक्त हुनेको संख्या ५ लाख ४३ हजार ५६३ छ । पछिल्लो विवरणसँगै विश्वभर संक्रमण जित्नेको संख्या १८ करोड ८१ लाख ७५ हजार ५२ छ ।
यो समाचार तयार पार्दासम्म विश्वभर संक्रमितको संख्या २१ करोड ४३ हजार३७१ पुगेको छ ।
होम तथा संस्थागत आइसोलसनमा रहने सक्रिय संक्रिमतको संख्या १ करोड ७४ लाख ६४ हजार ३९७ छ । यसमध्ये १ लाख ७ हजार ८७६ जनाको अवस्था गम्भीर रहेको वर्ल्डोमिटर्सले जनाएको छ ।
