आफैं हिमाली जिल्लामा गएर अवलोकन गरेपछि प्रधानमन्त्री सुशीला कार्कीले हिमाली जिल्लामा पनि फागुन २१ मै मतदान हुने बताएकी छन्। प्रधानमन्त्री आज सगरमाथाको फेद सोलुखुम्बु पुगेकी छिन् ।
सोलुखुम्बुको नाम्चे र सल्लरीमा सरोकारवालासँग छलफल गर्दै उनले निर्वाचन तयारीबारे ब्रिफिङ समेत लिएकी छन्। स्थानीय अधिकारीहरूको ब्रिफिङपछि प्रधानमन्त्री कार्कीले हिमाली जिल्लामा पनि फागुन २१ मै चुनाव हुने बताएकी हुन्।
प्रधानमन्त्री कार्कीले जिल्ला समन्वय समितिको कार्यालयमा सरोकारवालासँग छलफलपछि सञ्चारकर्मीसँग कुरा गरेकी हुन् । यस क्रममा उनले आफूले स्थानीय अधिकारी र सरोकारवालासँग कुरा गर्दा हिमाली जिल्लामा पनि फागुन २१ मै चुनाव गर्न सकिने अवस्था रहेको बताइन्।
प्रधानमन्त्रीलाई जिल्ला समन्वय समिति सोलुखुम्बुका प्रमुख कृष्णप्रसाद निरौला, प्रमुख जिल्ला अधिकारी लीला केसी पाण्डे, मुख्य निर्वाचन अधिकृत चन्द्रकुमार पोखरेल, प्रहरी नायब उपरीक्षक मनोजित कुँवरलगायतले निर्वाचन तयारी र जिल्लाको अवस्थाबारे ब्रिफिङ गरेका थिए।
