भदौ २३ र २४ गते देशभर भएका युवा आन्दोलनका नाममा भड्किएका हिंसात्मक गतिविधिबाट सबैभन्दा ठूलो मार नेपाल प्रहरीमा परेको छ । राजधानी उपत्यकामात्र होइन, देशका सुदूर गाउँसम्म फैलिएको आन्दोलनले प्रहरीको संरचना, सवारीसाधन र मनोबललाई गहिरो क्षति पु¥याएको तथ्यांक सार्वजनिक भएको छ ।

प्रहरी प्रधान कार्यालयका अनुसार, देशभरका १ सय ६८ वटा प्रहरी चौकी तथा ब्यारेक पूर्ण रूपमा ध्वस्त भएका छन् । यस्तै, २ सय १९ वटा प्रहरी चौकी आंशिक क्षतिग्रस्त बनेका छन् । कतिपय ठाउँमा आन्दोलनकारीले प्रहरी चौकीमा आगजनी गरेका थिए भने कतिपय स्थानमा भवन नै भत्काइएका थिए । यसरी ठूलो संख्यामा प्रहरी संरचना खरानी बनेपछि देशभर सुरक्षात्मक उपस्थिति कम हुन पुगेको थियो । तर, स्थानीय नागरिककै सहयोगमा अस्थायी ठाउँ खोजेर प्रहरीलाई पुनः परिचालन गरिएको छ ।

आन्दोलनका क्रममा प्रहरी चौकीमा रहेका ४ सय २२ वटा सवारी साधन पूर्ण रूपमा जलेर नष्ट भएका छन् । मोटरसाइकलदेखि गाडी र ट्रकसम्म आन्दोलनकारीले आगो लगाइदिएका थिए । केही सवारी साधनमात्र बचाउन सकिएको प्रहरीको दाबी छ । यसरी सवारीसाधन गुमाउँदा प्रहरीलाई अपराध नियन्त्रण र द्रुत परिचालनमा ठूलो कठिनाइ परेको छ ।

हिंसात्मक प्रदर्शनका क्रममा आन्दोलनकारीले प्रहरी चौकीमा रहेका ४ सयभन्दा बढी हतियार लुटेका थिए । हालसम्म ४८ वटामात्र हतियार फिर्ता गर्न सकिएको छ । बाँकी हतियार खोजी कार्य भइरहेको प्रहरीको भनाइ छ । हतियारको ठूलो संख्यामा लुटपाट हुनु सुरक्षाको दृष्टिकोणले गम्भीर चुनौतीका रूपमा लिइएको छ।