काठमाडौं महानगरपालिकाकी उपमेयर सुनिता डंगोलले अख्तियार दुरुपयोग अनुसन्धान आयोगको भूमिकामा प्रश्न उठाएकी छन्।
शनिबार पत्रकारसँको अन्तरक्रियाका क्रममा उनले काठमाडौं महानगरमा भ्रष्टाचार भएको भनेर पटकपटक विवादित कुरा आइरहेको सन्दर्भमा अख्तियारले छानबिन गर्नुपर्ने बताएकी हुन्।
महानगरका मेयर बालेन्द्र साह (बालेन)ले प्रमुख प्रशासकीय अधिकृत सरोज गुरागाईंसहितलाई आरोपित गरिरहेका सन्दर्भमा डंगोलले यसबारे अख्तियारले छानबिन गरेर विवादलाई किनारा लगाउनुपर्ने बताएकी हुन्।
उनले महानगरको बोर्ड बैठकको भिडियो पनि एकपक्षीय र अधुरो सार्वजनिक गरिएको भन्दै आपत्ति जनाएकी छन्।
‘यति धेरै भ्रष्टाचारको प्रसंग उठ्दा अख्तियार किन मौन छ ? अख्तियारले महानगरमा छानबिन गर्नै पर्छ’, उनले भनिन्, ‘अधुरो सूचना दिएर मानिसलाई अन्योलमा पार्नु हुँदैन। भ्रष्टाचारमन एकजना व्यक्ति मात्रै छ कि संगठित रूपमा लागेको छ ? यसको खोजी हुनुपर्छ। अख्तियारको मौनता त्यति राम्रो होइन।’
उपमेयर डंगोलले अहिले सबैभन्दा विवादित बनेको पुरानो बसपार्कस्थित काठमाडौं टावर अनावश्यक रहेको बताएकी छन्। जनताबाट लिएको उक्त ठाउँ बसपार्ककै रूपमा प्रयोग हुनुपर्ने उनको तर्क छ।
‘म जहिले पनि पिपुल्स फर्स्ट भनिरहेको छु। काठमाडौं टावर बनाउँदै गरेको ठाउँमा जनतासँग बसपार्क बनाउन जग्गा लिएको हो’, उनले भनिन्, ‘बसपार्कमा भवन ठड्याएर व्यापार गर्नु गलत हो। सरकारले जुन प्रयोजन र उद्देश्यका लागि जग्गा लिएको छ, त्यही प्रयोजनमा लगाउनु पर्छ।’
