नेकपा एकीकृत समाजवादीका अध्यक्ष माधवकुमार नेपालले तीनकुने घटनाको सुप्रिम कमाण्डर पूर्वराजा ज्ञानेन्द्र शाह भएको बताएका छन् ।
सोमबार काठमाडौँमा आयोजित एक कार्यक्रममा अध्यक्ष नेपालले दुर्गा प्रसाईलाई एक दिनको कमाण्डर बनाएर आफु सुप्रिम कमाण्डर बन्ने ज्ञानेन्द्र शाहले सबै घटनाको जिम्मेवारी लिनुपर्ने समेत बताए । अध्यक्ष नेपालले भने, ‘दुर्गा प्रसाईंलाई एकदिनको कमान्डर बनाएर आफू सुप्रिम कमान्डर बन्ने ज्ञानेन्द्र शाहले सबै घटनाको जिम्मेवारी लिनुर्छ ।’
उनले काठमाडौं महानगरले गरेको जरिवाना ज्ञानेन्द्र शाहले तिर्नुपर्ने उल्लेख गरे । उनले पूर्वराजालाई ७ लाख ९३ हजारको जरिवाना पत्र काटेर बालेनले हिम्मत देखाएको बताए । आफ्नो पार्टी कार्यालयमा आगजनी गरेर राजावादीले उदण्डता प्रदर्शन गरेपनि समयमा नै प्रहरी पुराउन नसक्नु सरकारको कमजोरी रहेको उनको भनाइ छ ।
शुक्रबारको घटनामा संलग्न सबैलाई कारवाही गर्न सरकारले आँट र हिम्मत देखाउनुपर्ने उनले बताए । उनले उक्त घटनाले राजावादीको चरित्र नाङ्गो रुपमा प्रस्तुत भएको जिकिर गरे ।
