गणतन्त्र पक्षधर राजनीतिक दलको बैठकले संविधानविरोधी गतिविधि गर्ने, संघीय लोकतान्त्रिक गणतन्त्रात्मक शासन उल्ट्याउने षड्यन्त्रमुलक गतिविधिको मुख्य जिम्मेवार पूर्वराजा ज्ञानेन्द्र शाह भएको निष्कर्ष निकालेको छ ।
बैठकले पूर्वराजा ज्ञानेन्द्र शाहले संविधानविपरीतका गतिविधि बढाएको भन्दै नियन्त्रण गर्नुपर्नमा जोड दिएको छ । बैठकपछि सञ्चारकर्मीसँग प्रतिक्रिया दिँदै गृहमन्त्री रमेश लेखकले यस्तो बताए । उनले हालको शासन व्यवस्था निकै लामो संघर्षपछि आएको र नेपालको संविधान र संविधानकै मार्फत देश विकास र जनताको सुरक्षामा एकजुट हुने पनि सहमति भएको बताए ।
उनले संविधानविरोधी कुनै पनि गतिविधिहरु नसहने निष्कर्ष निकालिएको पनि बताए । राप्रपाले आन्दोलनलाई थप सशक्त बनाउने भनेको छ नि भन्ने पत्रकारको जिज्ञासामा उनले भने, ‘संविधानविरोधी कुनै पनि कार्य सह्य हुनेछैन ।’
त्यस्तै, नेकपा माओवादीका तर्फबाट सहभागीमध्ये पूर्वमन्त्री शक्ति बस्नेतले गणतन्त्रविरोधी गतिविधि विशेषगरी शुक्रबारको जस्ता घटनाका विषयमा पहिचान गरेर दोषीमाथि कारबाही अगाडि बढाउनुपर्ने बैठकको निष्कर्ष रहेको बताए । बैठकमा प्रधानमन्त्री केपी शर्मा ओलीले संविधानविरोधी गतिविधि गर्नेलाई नियन्त्रण गरिने बताएका थिए।
