लुम्बिनी प्रदेशमा सवारी चालक अनुमति पत्र (लाइसेन्स) का लागि ट्रायल दिँदा आफूले चाहेको सवारीसाधान प्रयोग गर्न पाइने भएको छ । उद्योग तथा यातायात व्यवस्थामन्त्री सरोज थापा (रोज राणा) ले विभागीय प्रमुखहरुलाई यसबारे आवश्यक व्यवस्था गर्न निर्देशन दिएका हुन् ।  लाइसेन्सका लागि ट्रायल दिँदा ट्रायल सेन्टरकै सवारी साधन प्रयोग गर्नुपर्ने नियम हटाउन आफूले निर्देशन दिएको राणाले रातोपाटीलाई जानकारी दिए । निजी वा आफूले चाहेको अन्य सवारी साधन ट्रालय दिँदा प्रयोग गर्न पाइनेगरी निर्देशन दिइएको र सो निर्देशन कार्यालयमा गइसकेको दाबी गरे ।

यसका लागि बुधबार मन्त्रालयको कार्यकक्षमा सचिव उमेश ढुंगानासहित यातायात कार्यालयका प्रमुखहरुलाई बोलाएर निर्देशन दिइएको उनको भनाइ छ ।मन्त्री थापाले लुम्बिनी प्रदेशभित्र रहेका मापदण्ड नपुगेका ट्रायल सेन्टरहरुमा अनुगमन गरेर मापदण्डभित्र ल्याउन समेत निर्देशन दिइएको बताए । कतिपय ट्रायल सेन्टर झोलामा सीमित रहेको पाइएको भन्दै उनले अनुगमनपछि आवश्यक निर्णय लिइने पनि जानकारी दिए ।