कञ्चनपुरको दोदा नदीका कारण सिमरी गाउँ डुबानमा परेको छ। चुरे भएर बग्ने दोदामा आएको बाढी पुनर्वास नगरपालिका– ५ सिमरी गाउँ पस्दा डुबान भएको हो।

कृष्णपुर नगरपालिका– २ खल्लागोठ हुँदै लालझाडी, बेलौरी, पुनर्वास हुँदै भारतीय दुधुवा नेसनल पार्कमा मिसिने दोदा नदी सिमरी क्षेत्रमा समथर भाग भएकाले गाउँ पसेको स्थानीयले बताएका छन्। स्थानीय एवं पुनर्वासका सञ्चारकर्मी किशोर तामाङले उत्तर भएर दक्षिणतर्फ बग्ने नदी सिमरी गाउँमा पुग्दा समथर भएकाले दक्षिणतर्फ आउँदा गाउँ डुबानमा पर्दै आएको बताए।

‘दोदा नदीमा पानीको सतह वृद्धि भएपछि सोझै सिमरी गाउँसहितका आसपासका बस्ती डुबानमा पर्दै आएका छन्,’ उनले भने, ‘नदी गाउँ पस्दा हुलाकी राजमार्गसमेत अवरुद्ध भई आवातजावतमा समेत प्रभाव पर्दै आएको छ, अब यसको विकल्प खोज्नुपर्छ ।’ बुधबार सिमरी गाउँका ४० र रातोखालेका पाँच परिवार विस्थापित भएका छन्।

पुनर्वास नगरका मेयर तोयाप्रसाद शर्माले दुवै गाउँमा नदी पस्दा विस्थापित भएको बताए। मेयर शर्माका अनुसार विस्थापितका लागि सुरक्षित आवासदेखि खाद्यान्नको प्रबन्ध गरिएको छ। ‘हिजोभन्दा आज पानी घटिरहेको छ,’ उनले भने, ‘नदीमा पानीको सतह बढे जोखिम बढ्छ, घटे घट्दै जान्छ। फेरि विस्थापित घर फर्किन्छन्।’

बाढीले मानवीय तथा भौतिक क्षति नभएको मेयर शर्माले बताए । नदी गाउँ पसेपछि सशस्त्र प्रहरी, नेपाल प्रहरीसहितका स्थानीयले बाढी प्रभावित नागरिकको उद्धार गरेका छन्। प्रभावित मानिससहित उनीहरूको सरसामान सारिएको छ। सशस्त्र प्रहरी बल ३५ नम्बर शैलेश्वरी गणका गणपति प्रेमबहादुर रावलले बाढी प्रभावित नागरिकलाई उद्धार गरेर सुरक्षित स्थानमा सारिएको बताए। ‘हामीले उनीहरूलाई विपतकाे जोखिमबाट उद्धार गरेर सुरक्षित स्थानमा ल्याएका छौँ,’ उनले भने, ‘उनीहरू आफन्तको घरमा बसेका छन, पानी कम भए घर फर्किन्छन्।’

सशस्त्र प्रहरी संकटमा परेका मानिसको उद्धारदेखि अस्थायी तटबन्ध निर्माणमा खटिएको छ। शुक्लाफाँटा नगरपालिका– ११ कलुवापुर बजारसमेत डुबानमा पर्दै आएको छ । स्थानीय अक्कल विष्टले सडक निर्माण गर्दा यसअघि निकास रहेको कल्भर्ट पुरिँदा बजार डुबानमा परेको बताए। उनले भने, ‘चुनावका वेला भोट माग्न आउँछन्, आज सिंगाे बजार डुबानमा पर्दा कोही जनप्रतिनिधि आउँदैनन्। बरु डोजर लिएर आउँछन्।’

शुक्लाफाँटा नगरको वडा नम्बर १ का वडाध्यक्ष उत्तरदेव भट्टले स्थानीयले सडकको जमिन कब्जा गरेपछि डुबानको समस्या आएको आरोप लगाए। उनले स्थानीयले सडकको अतिक्रमण गरेको जमिन छाडे स्वतः डुबान समस्या हट्ने दाबी गरे। विभिन्न खोला नालाहरूमा आएको बाढीले चुरेदेखि तराईसम्मका उर्वराभूमि, तटबन्ध, कल्भर्टसहितका संरचना भत्काइदिएको छ ।