राष्ट्रिय सभा सदस्य जयन्तीदेवी राईले प्रधानमन्त्री पुष्पकमल दाहाल, पूर्वप्रधानमन्त्री शेरबहादुर देउवा र अर्थमन्त्री डा. प्रकाशशरण महतको जिल्लामा गएको बजेटबारे प्रश्न उठाएकी छिन्।
सोमबार राष्ट्रिय सभाको बैठकमा बोल्दै एकीकृत समाजवादीकी सांसद राईले तीन जिल्लाको बजेट सच्चिएर आएको हो वा होइन भन्दै प्रश्न गरिन्। बजेट जनताका लागि नभइ आत्मकेन्द्रीत भएर ल्याइएको उनको टिप्पणी छ।
जनताको लागि भन्दा पनि आत्मकेन्द्रित हुने नै बजेट छ। हामीले पहुँचका आधारमा नभइ आवश्यकताका आधारमा बजेट विनियोजन होस् भनेका छौँ। तर तीन जिल्लाको कुरा मात्रै आए, सच्चिएर आयो की आएन, प्रधानमन्त्री, निवर्तमान प्रधानमन्त्री र अर्थमन्त्रीको जिल्लामा गएको बजेट सच्चिएर आयो की आएन ?’ सांसद राईले प्रश्न गरिन्।
तीन जिल्ल्लामा केन्द्रीत रहेको बजेट सच्चिएर नआएसम्म आगामी आर्थिक वर्षको बजेट सन्तुलित नहुने उनको दाबी छ। बजेट निर्वाचन क्षेत्र केन्द्रित रहेको र अर्को पटक आफैँलाई चुनाव जित्ने र मन्त्री बन्ने दाउमा मात्रै आएकाले बजेटबाट आशा गर्न नसकिने उनले प्रष्ट पारिन्।
‘अहिले पनि बजेट सन्तुलित छैन, व्यवहारिक छैन, केन्द्रिकृत छ, आत्मकेन्द्रित छ। अहिले पनि यो बजेट निर्वाचन क्षेत्रलाई जोगाउने र फेरि मन्त्री, सांसद हुने सपना बोक्ने किसिमको मात्रै छ,’ उनले भनिन्।
