प्रमुख प्रतिपक्षी नेकपा एमालेको अवरोधका कारण राष्ट्रिय सभाको बैठक स्थगित भएको छ ।
शुक्रबार बजेटको बिभिन्न मन्त्रालयगत शीर्षकमाथि छलफल गर्ने कार्यसूची थियो । तर एमालेले प्रधानमन्त्रीको राजीनामा माग गर्दै संसदमा अवरोध गर्यो ।
प्रधानमन्त्री पुष्पकमल दाहाल प्रचण्डले आफूलाई प्रधानमन्त्री बनाउन सरदार प्रितम सिंह पटक–पटक दिल्ली गएको भनी दिएको सार्वजनिक अभिव्यक्तिलाई लिएर एमालेले राष्ट्रिय सभा र प्रतिनिधिसभाको बैठक चल्न दिइरहेको छैन् । शुक्रबार पनि एमालेले बैठक सुरु हुने वित्तिकै उठेर विरोध गर्यो ।
त्यसपछि राष्ट्रिय सभाका अध्यक्ष गणेश प्रसाद तिमिल्सिनाले एमाले सांसद विमला घिमिरेलाई बोल्न समय दिए । सांसद घिमिरेले प्रधानमन्त्रीले राजीनामा नदिएसम्म संसदको कार्यसूची अगाडि नबढाउन आग्रह गरिन् ।
तर, अध्यक्ष तिमिल्सनाले प्रधानमन्त्रीले जवाफ दिने वातावरण बनाउन आग्रह गरे । एमालेले मानेन र करिब २० मिनेट (१९ मिनेट ४६ सेकेण्ड)सम्म एमाले सांसदहरु उभिइरहेपछि अधयक्ष तिमिल्सनाले बैठक नै स्थगित गरिदिए ।
राष्ट्रिय सभाको अर्को बैठक आगामी आइतबार बिहान ११ बजेर ३१ मिनेटका लागि बोलाएको छ ।
