चीनको होङ्झाउमा आयोजना हुने एसियाली खेलकुद प्रतियोगिता (एसियाड)का लागि बुधबार स्क्वास खेलका खेलाडी छनोट भएका छन् । नेपाल स्क्वास राकेट्स संघले छनोट प्रतियोगिता आयोजना गरी एसियाली खेलकुदका लागि खेलाडी चयन गरेको हो ।
संघका अनुसार, राउन्ड रोविन लिगका आधारमा छनोट प्रतियोगिता सञ्चालन गरिएको थियो । छनोट प्रतियोगिताबाट एसियाली खेलकुदका लागि तीन पुरुष र तीनजना महिला खेलाडी चयन भएका हुन् । पुरुषतर्फ अरहन्तकेशर सिम्ह, अमृत थापामगर र अमिर ब्ह्लोन एसियाली खेलकुदका लागि छनोट भएका छन् ।
यसैगरी महिलातर्फ विपना ब्ह्लोन, कृष्णा थापा र स्वस्थानी श्रेष्ठ एसियाली खेलकुदका लागि छनोट भएको संघले जनाएको छ । एसियाली खेलकुदमा सहभागी हुने स्क्वास टोलीको प्रशिक्षकमा हिराबहादुर थापा र ब्यवस्थापकमा किशोरकुमार महर्जन रहेका छन् । १९औं एसियाली खेलकुद आगामी सेप्टेम्बर २३ देखि अक्टुबर ८ तारिखसम्म आयोजना हुनेछ ।
