नेपाली कांग्रेसका सभापति तथा संसदीय दलका नेता शेरबहादुर देउवाले संसदीय दलमा पदाधिकारी मनोनीत र कार्यसमिति विस्तारको तयारी थालेका छन् । बिहीबार बिहान देउवा निवास धुम्बाराहीमा बसेको कांग्रेस संसदीय दलको कार्यसमिति बैठकमा कार्यसमिति विस्तारबारे छलफल भएको हो ।
पुस ६ मा कांग्रेस संसदीय दलको नेतामा निर्वाचित देउवाले पदाधिकारी मनोनीत र कार्यसमिति विस्तारको तयारी थालेका हुन् । योबीचमा देउवाले संसदीय दलको प्रमुख सचेतकको जिम्मेवारी सांसद रमेश लेखकलाई दिएका छन् । देउवाले अहिलेसम्म दलको उपनेता र सचेतक भने मनोनीत गरेका छैनन् ।
संसदीय दलको उपनेता र सचेतक मनोनीत गर्ने देउवाको तयारी छ । उपनेतामा पूर्णबहादुर खड्का र सचेतकमा सीता गुरुङलाई मनोनीन गर्ने तयारी भइरहेको देउवाको सचिवालयले रातोपाटीलाई बतायो । । देउवाले संसदीय दलले कार्यसमिति विस्तारका लागि छलफल अगाडि बढाइसकेका छन् । बिहीबारको बैठकमा कार्यसमितिका सदस्यको निर्वाचनका सन्दर्भमा छलफल भएको कांग्रेस प्रमुख सचेतक रमेश लेखकले रातोपाटीलाई बताए ।
