नेपाल-अमेरिका अन्तर्राष्ट्रिय फिल्म महोत्सवको छैटौं संस्करण आयोजना हुने भएको छ।
अमेरिकास्थित वासिङ्टन डिसीमा असार ७ देखि ९ गतेसम्म आयोजना गरिने महोत्सवसका लागि विश्वभरबाट आवेदन खुला गरिएको छ।
महोत्सवमा फिचर फिल्म, वृत्तचित्र, छोटा फिल्म, एनिमेशनका साथै सबै विधाका फिल्महरू प्रदर्शन गरिनेछन्। नेपालबाहेक अमेरिका, दक्षिण एसियासहित विभिन्न देशका स्वतन्त्र फिल्महरू यस महोत्सवको उच्च प्राथमिकतामा पर्नेछन्।
अन्तर्राष्ट्रिय फिल्मकर्मीको समितिले आवेदन परेका मध्ये उत्कृष्ट फिल्महरू प्रदर्शनका लागि छनोट गर्नेछन्। प्रदर्शन गरिएका मध्येबाट उत्कृष्ट फिल्महरूलाई विभिन्न अवार्डबाट पुरस्कृत गरिनेछ।
अमेरिकाको मेरिल्याण्ड राज्यमा स्थापित गैरनाफामुलक संस्था नेपाल-अमेरिका फिल्म सोसाइटीले सन् २०१७ देखि प्रत्येक वर्ष यो महोत्सवको आयोजना गर्दै आएको छ।
