जनता समाजवादी पार्टीका संघीय परिषद अध्यक्ष डा. बाबुराम भट्टराईकी छोरी मानुषी यमी भट्टराईले राजनीतिमा पुस्तान्तरण मागेर नहुने भन्दै त्यसका लागि पार्टीभित्रै विद्रोहको आवश्यता रहेको बताएकी छन् ।
बुधबार एक संचार माध्यम संगको कुराकानीमा आफूले आउँदो आम निर्वाचनमा काठमाडौंबाट उम्मेदवारी दिने तयारी गरेको र त्यसका लागि पार्टीभित्र र बाहिरका नयाँ पुस्तासँग सकार्य गर्दै विद्रोह गर्नुपर्ने बताइन् ।
उनले भनिन् , ‘पुस्तान्तरण भन्ने चिज कसैले गरेर हुने होइन, यसका लागि पार्टीभित्रै विद्रोह हुन्छ । म त्यसको पक्षमा हुँ । हामी आफैंले पहल गरेर हुने हो । क्षमता प्रदर्शन गरेर नै हामी लिन सक्ने ठाउँमा पुग्नुपर्छ भनेर नै म तयारीमा लागेको हो ।’
हाल सत्तारुढ गठबन्धनमा रहेको जसपाले गठबन्धनभित्र निर्वाचन क्षेत्र भागवण्डामा काठमाडौंको निर्वाचन क्षेत्र नपाए के गर्ने भन्ने प्रश्नमा मानुषी आफू ‘पालो आउला र खाउँला’ भन्ने पक्षमा नरहेको बताउँछिन् ।
‘कुनै बेला पालो आउला र खाउँला भन्ने पक्षमा म छैन,’ उनी भन्छिन्, ‘हामी आफैंले मेहनत गर्ने हो । हामी आफैंले आह्वान गर्ने हो । जनताका मुद्दामा बोल्ने हो त्यसकै पहलमा जित्नुपर्छ भन्ने मान्यता राख्ने मान्छे हुँ ।’
उनले थपिन्, ‘गठबन्धन, आदि, इत्यादि भनेको राजनीतिक दलको शीर्ष तहबाट आवश्यकता महसुस गरेर गर्दै गर्नुहोला । तर, म चाहिँ राजनीतिलाई त्यसरी मात्रै डो¥याउनुपर्छ भन्ने पक्षमा छैन ।’
