नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले नेपाली राजनीतिक प्राणालिभित्र थुप्रै खोटहरु रहेको बताएका छन् ।

शुक्रबार २१ औं कृष्णसेन इच्छुक स्मृति दिवसका अवसरमा भएको कार्यक्रमलाई सम्बोधन गर्दै अध्यक्ष प्रचण्डले एस्तो बताएका हुन् ।

उनले भने , ‘कहीँ न कहीँ हाम्रो सिस्टमभित्र थुप्रै खोटहरू छन् । जसले गर्दा समाज रुपान्तरण क्रान्तिकारी ढंगले होइन दिग्भ्रम र विचलनतिर गइरहेको छ र त्यो क्रम अझ बढ्दो छ’ ।

‘समाज रुपान्तरण र क्रान्तिकारीतिर जाने होइन, दिग्भ्रमिततिर गइरहेको छ । विचार र सिद्धान्त भन्दा क्षणिक र अस्वस्थ प्रतिस्पर्धामा समाज गइरहेको हामीलाई भ्रम हुन्छ’ प्रचण्डको भनाइ छ । त्याग र साधनाको संस्कृति अपनाउने कुरामा प्रतिवद्ध भएमात्रै कृष्ण सेनप्रति सच्चा श्रद्धाञ्जली हुने पनि प्रचण्डले बताए । उनले सेनसँगका सहकार्यका स्मृति आफुसँग अझै ताजै रहेको भन्दै तपस्या र साधनामा केही कमी नभएका सेनमा बलिदानको उच्च भावना पनि रहेको बताए ।