नेपाली कांग्रेसका महामन्त्री विश्वप्रकाश शर्माले नेकपा एमाले एक क्विन्टल आलु भएको तर गठबन्धन एक/एक तोला मात्र भए पनि सुन भएको बताएका छन् ।

आज आइतवार काठमाण्डाैमा भएको एक कार्यक्रममा बोल्दै महामन्त्री शर्माले भने , ‘नेपाली कांग्रेस पार्टी बलियो ढङ्गले विजयी बन्दै गर्दा कमरेड केपी ओलीले गठबन्धनलाई एक/एक किलाका पाँच वटा ढक हुन् र एमाले एक्लै क्विन्टल हाे भन्नुभयो । हामी पाँच पार्टी एक/एक किलाका ढक होइनौँ, हामी एक/एक तोला मात्रै हौँ । एमाले चाहिँ क्विन्टल नै हो तर एक क्विन्टल आलु र पाँच वटा तोला सुनको हिसाब बजारमा गएर सोध्यो भने कमरेड केपी ओलीलाई थाहा हुन्छ ।

महामन्त्री शर्माले कांग्रेस यही वैशाख ३० गते हुने पालिका चुनावमा राष्ट्रिय रूपमा विजयी बन्ने दाबी गरे । उनले नेकपा एमालेले बाहिर एक्लै भिड्न तयार रहेको अभिव्यक्ति दिए पनि भित्र भने कमल थापासँग तालमेल गरिरहेको बताए ।