चितवनको भरतपुर महानगरपालिकामा मेयरको पदको उम्मेदवारी काङ्ग्रेसबाट हुनु पर्ने भन्दै त्यसको लागि जिल्लाका नेताहरु पार्टी नेतृत्वको ध्यानाकर्षण गराउन केन्द्रीय कार्यलय काठमाडौ पुग्ने भएका छन् ।
पार्टिका केन्द्रिय सदस्य टेक प्रसाद गुरुङ, जिल्लाका सांसद र जिल्ला सभापतिसहितको टोली बुधबार डेलिगेसनका लागि काठमाडौं जान लागेको हो ।
अघिल्लो स्थानीय निर्वाचनमा कांग्रेसको समेत समर्थनमा भरतपुर महानगरपालिकाको मेयरमा माओवादीकी रेनु दाहाल विजयी भएकी थिइन् । यसपटक पनि मेयरमा माओवादीले दाबी गरेको छ ।
तर यसपटक कांग्रेसले पनि मेयरमा दाबी गरेको छ । चितवन कांग्रेसका सभापति राजेश्वर खनालले भरतपुर महानगरमा कांग्रेसले मेयरको दाबी नछोड्ने बताउँदै आएका छन् । अघिल्लो पटक कांग्रेसले माओवादीलाई सघाएकाले अब माओवादीले कांग्रेसलाई सघाउनु पर्ने उनको धारणा छ ।
२०७४ को स्थानीय तह निर्वाचनमा भरतपुर महानगरपालिकामा माओवादीले मेयर र कांग्रेसले उपमेयर उम्मेदवार बनाएर तालमेल गरेका थिए ।
