चिकित्सा शिक्षा आयोगले एकीकृत प्रवेश परीक्षा सञ्चालन कार्यविधि, २०७७ संशोधन गरि परिक्षाको नतिजामा पर्सेन्टाइल प्रणाली लागू गर्ने भएको छ ।
नतिजामा पर्सेन्टाईल प्रणाली लागू गर्दा परीक्षामा सहभागी भएका परीक्षार्थीमध्ये न्यूनत्तम ५० प्रतिशत अध्ययनका लागि योग्य हुने आयोगको दाबी छ ।
संशोधित कार्यविधिले चिकित्सा शिक्षाका विभिन्न तहका नतिजाको योग्यताक्रममा समावेश हुनका लागि न्यूनत्तम ५० औं पर्सेन्टाइल र सोभन्दा माथि रहेको हुनुपर्ने साथै सही उत्तरका लागि एक अंक प्राप्त हुने तथा प्रत्येक गलत उत्तरका लागि ०.२५ अंक घटाउने व्यवस्था गरेको छ ।
आयोगले गत वर्ष कार्यान्वयन गरेको पद्धतिमा दुई सय पूर्णाङ्कमा सञ्चालित परीक्षामा न्यूनतम एक सय अंक अर्थात् ५० प्रतिशत अंक ल्याउने विद्यार्थी मात्र चिकित्सा शिक्षामा भर्ना हुन पाउने व्यवस्था गरेको थियो ।
यो व्यवस्थाले नर्सिङ, फार्मेसीलगायत विषयमा मेडिकल कलेजका लागि तोकिएको सिट संख्याको आधा भन्दा कम विद्यार्थी योग्य भएपछि कार्यविधि संशोधन गरी ‘पर्सेन्टाइल’ प्रणाली लागू गरिएको आयोगको भनाई छ ।
चैत १८, २० र २१ मा हुने एकीकृत प्रवेश परीक्षाको नतिजामा पर्सेन्टाइल प्रणाली लागू हुनेछ । आयोगको अनुसार एक परीक्षामा ३६ हजार विद्यार्थी सहभागी हुनेछन् । यो वर्ष चिकित्सा शिक्षा अन्तर्गत स्नातक तहमा ८ हजार विद्यार्थीले पढ्न पाउने गरी सिट संख्या तोकिएको छ।
