काठमाडौंमा चर्को शुल्क लिएर ग्राहकलाई कोरोना संक्रमण नभएको नक्कली रिपोर्ट बनाइदिने चार जना पक्राउ परेका छन् ।
पक्राउ पर्नेमा तेमाल गाउँपालिका-५ काभ्रेका माधव मैनाली , बलरा नगरपालिका-७ सर्लाहीका प्रसन्नकुमार झा , विदेह नगरपालिका-४ धनुषाका रोशनकुमार छिट्टान र छिरेश्वर नगरपालिका-१ धनुषाका नागेन्द्र यादव रहेका छन् ।
उनिहरुलाई भक्तपुरको मध्युपर थिमीस्थित नागरिक कम्युनिटी टिचिङ अस्पताल र काठमाडौंको तीनकुनेस्थित कान्तिपुर अस्पतालबाट नक्कली पीसीआर रिपोर्ट बनाएको अभियोगमा पक्राउ गरिएको हो ।
उनीहरुले व्यक्तिको स्वाबको नमुना नलिइकनै रिपोर्ट दिने गरेको र कतिपय पीसीआर पोजेटिभ देखिएका नमुनाको सिटी भ्यालु तलमाथि गरी विचौलियाको मिलेमतोमा पीसीआर रिपोर्ट नेगेटिभ बनाइदिने भनी एकजना व्यक्ति बापत १० हजार रुपैयाँसम्म असुल गरेको पाइएको पनि अपराध अनुसन्धान महाशाखाले बताएको छ ।
उनीहरूको साथबाट पीसीआर रिपोर्ट नेगेटिभ बनाउने कम्प्युटर मनिटर, ल्यापटप, सीपीयु, नक्कली पीसीआर रिपोर्ट र मोबाइलगायत सामग्रीसमेत बरामद गरेको स्रोतले जनाएको छ ।
