अनलाइन माध्यमबाट जुवा खेल्ने र खेलाउने ७४ जनालाई ६ लाख ९० हजार रुपैयाँ सहित काठमाण्डौबाट पक्राउ गरिएको छ ।
आइतवार राति काठमाण्डौ महानगरपालिका वडा नम्बर ६ बौद्धमा दोलखाका सुवास घिसिङले सञ्चालन गरेको रेस्टुरेन्टमा अनलाइन जुवा बिङ्गो खेलिरहेका ७४ जनालाई प्रहरीले पक्राउ गरेको हो । उनीहरूमध्ये ६६ जना पुरुष र आठ जना महिला रहेका छन् ।
रेस्टुरेन्टमा जम्मा भएर अनलाइन जुवा खेल्ने उनीहरूको साथबाट ६ लाख ९० हजार रुपैयाँ नगद, अनलाइन जुवा खेलाउन प्रयोग हुने मोबाइल लगायतका सामग्री बरामद गरिएको पनि महानगरीय प्रहरी परिसर टेकुले जनाएको छ ।
