काठमाडौँ उपत्यकाको तापक्रम यो वर्षकै सबैभन्दा न्यून बिन्दुमा झरेको छ ।
जल तथा मौसम पुर्वानुमान महाशाखाका अनुसार आज काठमाडौँको न्यूनतम तापक्रम यो वर्षकै कम ३ डिग्री सेल्सियस मापन भएको छ । हिजो बुधबारको तापक्रम ४.३ डिग्री थियो । तापक्रम अझै घट्न सक्ने र चिसो बढ्ने भएकाले सतर्कता अपनाउन जल तथा मौसम विज्ञान विभागले अपिल गरेको छ ।
काठमाडौं उपत्यकासहित देशभर औसतमा दैनिक एकदेखि दुई डिग्री सेल्सियससम्म तापक्रम घट्न थालेको विभागले जनाएको छ । आज सबैभन्दा कम तापक्रम जुम्लामा मापन भएको छ । जुम्लाको तापक्रम माइनस ५.७ डिग्रीमा झरेको छ ।
तराई क्षेत्रको न्यूनतम तापक्रम पनि घटेको छ । आज पहाडी क्षेत्रको मौसम आंशिक बदली हुनेछ भने तराईका जिल्लामा दिउँसोको समयमा मौसम सफा रहने सम्भावना रहेको मौसम पूर्वानुमा महाशाखाले जनाएको छ ।
