कञ्चनपुरको बेलडाँडीबाट सशस्त्र प्रहरीले प्रेस लेखेको ज्याकेट लगाएर लागुऔषध ओसारपसार गर्ने एक जनालाई पक्राउ गरेको छ ।
शनिबार सशस्त्र प्रहरी बल नेपाल नम्बर ३५ गण हेडक्वार्टर शैलेश्वरी कञ्चनपुर मातहत बोर्डर आउट पोष्ट भुडा र झिलमिलाबाट खटिएको संयुक्त पैदल सीमा गस्ती टोलीले बेलडाँडी गाउँपालिका– ३ वैवाहबाट प्रेस लेखेको ज्याकेट लगाएका कञ्चनपुरकै शुक्लाफाँटा नगरपालिका- ४ बस्ने २५ वर्षीय नरेश प्रसाद जोशीलाई पक्राउ गरेको हो ।
भारतीय नागरिकबाट केही लिएको शङ्का लागि चेकजाँच गर्ने क्रममा जोशीको साथबाट ७ ग्राम खैरो हिरोईन नामक लागुऔषध, २ थान मोबाइल, १ थान क्यामेरा, ५ थान बैंक चेक, १ थान एटीएम कार्ड, १ थान सुदूर खबरको परिचय पत्र, १ थान प्रेस पास र मोटरसाइकलको ब्लु बुक समेत बरामद गरिएको प्रहरीले जनाएको छ ।
बरामद गरिएका सामान र जोशीलाई आवश्यक कारबाहीको लागि ईलाका प्रहरी कार्यालय बेलडाँडीमा बुझाइएको सशस्त्र प्रहरी बल नेपाल नम्बर ३५ गण हेडक्वार्टर शैलेश्वरी कञ्चनपुरले जनाएको छ ।
