भारतीय प्रधानमन्त्री नरेन्द्र मोदी कोरोना संकटपछिको पहिलो विदेश भ्रमणको सिलसिलामा विहिबार बंगलादेश पुगेका छन् ।
बंगलादेशको ५० औं स्वतन्त्रता दिवस मनाउन आयोजित समारोहमा भाग लिन मोदी दुई दिने भ्रमणमा ढाका निस्किएका हुन् । मोदीलाई ढाका विमानस्थलमा समकक्षी शेख हसिना वाजेदले स्वागत गरिन् ।
मोदीको यसपटकको बंगलादेश भ्रमणलाई अर्थपूर्णरुपमा हेरिएको छ । धेरैले उनको ढाका भ्रमणलाई पश्चिम बंगालको आसन्न विधान सभा चुनावसँग जोडेर हेरेका छन् । उनले ढाका भ्रमणबाट बंगाल चुनावमा त्यहाँको मतुआ समुदायलाई बीजेपीतर्फ आकर्षण गर्ने अपेक्षा गरिएको छ ।
राजधानी ढाकाभन्दा बाहिर पुगेर मोदीले मतुआ समुदायका धर्मगुरुलाई भेटेर उक्त समुदायका लागि केही सहयोग घोषणा गर्ने भारतीय संचारमाध्यमले उल्लेख गरेका छन् ।
स्वतन्त्रता दिवसको अवसरमा बंगलादेशले छिमेकी मित्रराष्ट्रलाई निम्तो दिएको छ । नेपाली राष्ट्रपति, श्रीलंकाली र भुटानी प्रधानमन्त्रीले पनि यसैसाता ढाका भ्रमण गरिसकेका छन् ।
