तीन वटा मेडिकल कलेजका आवासीय चिकित्सकहरूले आजदेखि ओपीडी सेवा बहिष्कार गरेका छन्।
२३ दिनदेखि चिकित्सा शिक्षा सुधारको मागसहित अनशनमा बसेका डा. गोविन्द केसीको जीवन रक्षाको माग गर्दै त्रिवि शिक्षण अस्पताल, वीर अस्पताल र बीपी कोइराला स्वास्थ्य विज्ञान प्रतिष्ठानका आवासीय चिकित्सकहरूले ओपीडी सेवा बहिष्कार गरेका हुन्।
यी तीन शिक्षण संस्थाका चिकित्सकहरुले एक विज्ञप्ति जारी गर्दै अनशनको २२ दिन पूरा भइसक्दा पनि सरकारले बेवास्ता गरेको भन्दै चरणबद्ध आन्दोलन घोषणासमेत गरेका छन्।
घोषणाअनुसार ओपीडी सेवा बन्द गर्नुका साथै आवासीय चिकित्सकहरूले कालोपट्टीसहित धर्नाका विभिन्न कार्यक्रमसमेत सञ्चालन गरिने बताएका छन्। कोभिड–१९, इमर्जेन्सी तथा इन्डोर सेवा अवरोध नगरी कालोपट्टी बाँधेर सेवा प्रवाह गर्ने विज्ञप्तिमा उल्लेख छ।
डा. केसीको जीवनरक्षाका लागि वार्ताटोली गठन गर्न माग गर्दै माग पूरा नगरे आन्दोनका थप कार्यक्रम गर्ने बताएका छन्।
त्रिवि शिक्षण अस्पतालमा अनशनरत डा. केसीको स्वास्थ्य अवस्था निकै कमजोर बन्दै गएको उपचारमा संलग्न चिकित्सकले बताउँदै आएका छन्। केसीलाई अक्सिजनको सहारामा राखिएको छ भने उनले अन्य कुनै उपचार लिन मानेका छैनन्।
